Guía de publicación

1. XERAL

O artigo ha de ser inédito e non poderá publicarse en ningún outro medio, plataforma ou asociación sen autorización expresa de O Ferrado. Como excepción, poderán remitirse a O Ferrado creacións xa publicadas en linguas estranxeiras diferentes do castelán, previa notificación e aprobación do Consello Editorial desta circunstancia.
A temática dos artigos é libre, pero, en termos xerais, deberá axustarse á liña editorial do Ferrado: a divulgación cultural, política e lingüística en relación coa Galiza.
É preciso enviar unha pequena biografía e unha fotografía para ilustrar o perfil da persoa autora do artigo. A imaxe debe ser de plano medio ou primeiro plano, sen interferencias visuais en rostro e corpo e, preferentemente, con ángulo normal ollando cara á cámara. Recomendamos revisar os perfís publicados das persoas colaboradoras.
Debe achegarse, como mínimo, unha imaxe para o encabezamento do artigo. De xeito opcional, poden enviarse máis imaxes para ilustrar o corpo do texto. En todo caso, as imaxes deben ser de creación propia, de uso libre ou ben contar coa autorización expresa da persoa propietaria para a súa publicación.
Tamén será necesaria unha pequena sinopse do artigo, que contará cunha extensión máxima de dúas liñas.
As propostas de colaboración deberán ser enviadas por correo electrónico ao seguinte enderezo: contacto@oferrado.gal
O Ferrado non se fai responsable da opinión expresada nos artigos publicados.

2. LIBRO DE ESTILO

Os artigos deben ir redactados en lingua galega. A persoa autora ten liberdade de escoller aquela normativa ortográfica que considere axeitada.
Os textos entregaranse en formato docx. (ou compatible) en tipografía Times New Roman corpo 11 e entreliñado 1,15.
As colaboracións terán un máximo de dúas páxinas (excluíndo fotografías e bibliografía).
Todo tipo de referencia, tanto de texto como de imaxe, debe seguir correctamente algún dos sistemas de citación existentes. A modo de suxestión, unha das guías máis utilizadas no mundo académico e xornalístico é o estilo APA.
Os textos someteranse a unha revisión lingüística, o que pode implicar modificacións de redacción.

__________________________________________________________

NOTA DO CONSELLO EDITORIAL

O Ferrado tolera diferentes puntos de vista sempre e cando estean enmarcados no galeguismo e no respecto á cultura e á lingua galega. Os artigos publicados na revista non representan ningún consenso de pensamento. O que se esixe deles é que sexan competentes e teñan unha visión argumentada, representando opinións honestas expresadas de maneira sensata. O Ferrado non acepta responsabilidade polas opinións vertidas en ningún artigo, asinado ou sen asinar, publicado na páxina. O que si acepta é a responsabilidade de darlle a todos eles unha oportunidade de aparecer na nosa revista cultural.